Namimiss ko nang maging halimaw.
Iyan yung bigla kong naisip habang nagtitimpla ng kape nung nakaraang linggo. Nung nakaraang linggo pa yun, pero hanggang ngayon, di ko pa rin malimutan.
Sabi nila, minsan lang magsalita ang "soul" ng tao. Pakiramdam ko, espiritu ko yung narinig kong nagsasalita ng mga linyang iyon. Hanggang ngayon, nababagabag pa rin ako. Sa kabilang banda, iniisip kong hindi na maayos ang daloy ng mga ideya sa isip ko kaya kung anu-ano na lang ang sinasabi ko. Pero sa isang banda, alam ko sa sarili kong totoo ang sinasabi ng "soul" ko.
Napamessage nga ko sa isa kong malapit na kaibigan dati. Pero sa palitan namin ng mensahe, hindi ko nasabi ang gusto ko talagang sabihin, na "Namimiss ko nang maging halimaw." Hindi ko rin alam kung bakit. Basta parang may pumigil lang sa akin.
Pa-alon-alon pa rin sa karagatan ng isip ko ang linyang iyon.
Kailan kaya babalik ang pagkahalimaw ko?
-h
